Кыргыз Эл акыны,Токтогул атындагы мамлекеттик сыйлык­тын лауреаты, коомдук ишмер Эсенгул Ибраевдин 80 жылдыгын коомчулук кеңири белгиледи.

Кыргыз элине аттын кашка­сындай таанымал акын, куйкум сөздүү таамай сатирик Эсенгул Ибраев тирүү болсо быйыл жаз­дын жаркыраган айларында 80 жашка чыкмак. «Өмүр бизден өтүп кетсе эл эмгектен эскерсин» де­гендей, акындын калтырып кеткен баа жеткис мурасы болгон ырла­ры атайын өткөрүлгөн кечелер­де, конференцияларда көркөм окулуп, чыккан китептеринин көргөзмөсү Улуттук китепканада уюштурулду. Акындын мааракеси Улуттук филармонияда да чоң салтанат менен белгиленип, ке­чеге келген коомдук ишмерлер, акын-жазуучулар маркум акынды жылуу эскеришип, ырларына чык­кан обондор жаңырды. Мындан тышкары, Э.Ибраевдин туулган айылында да жердештери кече­лерди өткөрүшүп, арбагына куран түшүрүштү. Залкар акын Эсенгул Ибраевдин эл, жер, мекенчил­дик, тил маселесине арналган публицистикалык ырлары, сүйүү лирикалары экинчи өмүрүн татык­туу өтөп жатканына окурмандар өздөрү күбө болушту. Салтанатка келгендер «Бали, акындын ыр­лары!» дешип, Эсенгул аганын талантына таазим этишти.

Майрамбек ТОКТОРОВ